Gen 28 | BNP | STEP | Lakea e Isak i galea e Iakop, i gamaia, i vakukua, “Naha ni parangi na ngatavine o Kenan.

Genesis 28

E Iakop i Ha Lakea ne Leban

1 Lakea e Isak i galea e Iakop, i gamaia, i vakukua, “Naha ni parangi na ngatavine o Kenan. 2 O lakea malaviriri o Padan-Aram na robo e Mesapotamia, na tabeke e tamane kinamu, e Betuel. O bole talea vonga ne hamu e Leban, tara e tuna a ngatavine, ge girihimu. 3 A Vure Tuhaka ^{▼▼(28:3)‘A Vure Tuhaka’ na nita Hibru i manga e ‘El Sadai.’} ge gamai ioe, go vakabele, go vakakupo e huriki a hamomu. 4 ^bE Bakovi Dagi ge gamai ioe turana e huriki a hamomu, i manga a hini i gamaia e Abraham hosi. Muri bara o bolea a malala, ra o made manga mosi vona ngane, ra malala a Vure i habia ne Abraham.” 5 Lakea e Isak i rudua e Iakop i vano i lakea o Padan-Aram ne hana e Leban, e tune Betuel, ra hamone Aram. E Leban e kurabane Rebeka. E Rebeka e kinane Iakop rua e Esau.

6 E Esau i lohoka vona ngane e Isak i gamaia e Iakop, muri i rudua i lakea o Padan-Aram ge bolea vonga e girihina. Na tahuna i gamaia i vakukua nahea ge parangi a ngatavine o Kenan. 7 E Iakop i longototo e tamana e kinana, i vano i lakea o Padan-Aram. 8 Pali e Esau i lohoka vona ngane e tamana i uka ma i ngaru a ngatavine o Kenan. 9 Lakea, i vano i parangi vona e Mahalat, e tune Ismael e kurabane Nebaiot.

E Iakop i Vurena o Betel

10 E Iakop i malaga o Bersiba, ge lakea o Haran. 11 I bele vona a tabeke tara, i mahita, a vuhuna i rolo a haro. I bolea tara kedo i ru polotano na gina, i kaloho langa vona, i mahita. 12 ^cNa tahuna i mahita i vurena, i masia a nirike ni vakapesi na malala, i padoia a hunu, lakea e huriki a agelo na Vure ri puru rike vona. 13 ^dE BAKOVI DAGI i pesi polo meli vona, i ta maea, “Iau e BAKOVI DAGI, a Vure ne tubumu e Abraham, e tamamu e Isak, ga habia vomu, ne huriki a hamomu a malala o mahita vona. 14 ^eE huriki a hamomu bara ri ala kupo manga a habulo na malala. Bara mu made vona a hini i vakatubu na nirolona haro, i lakea mai a nirikena haro, a hini i sike lakea i puru lakea. E huriki a viri lobo na malala ga gamai ria, a vuhuna iau a gamai e huriki a hamomu. 15 Iau ga laho turamu, ga matakari ioe na hini o lakea vona. Muri ga bole mule valai ioe koea na malala iea. I uka ma ga pe ioe ngane, bara rata taro a maka maki a taki ioe vona.”

16 E Iakop i hadongo, i luhoi maea, “Muholi, e BAKOVI DAGI i made vona a hini nga, pali iau i uka ma a lohoka vona.” 17 I mangenge, i ta maea, “Iau a mangenge hateka vona a tabeke iea, a vuhuna ra tabeke iea a roho na Vure, a dili dala na hunu.”

18 Na hatelanga pokopoko na parava muri, e Iakop i bolea a kedo, ra i kaloho langa vona, i toto pesia ga kilakila. Muri i bolea a nibiri, i guru langea vona. 19 Lakea i vunua a tanga iea e Betel. ^{▼▼(28:19)‘Betel’ na nita Hibru i manga ‘a roho na Vure.’} Ra tanga dagi iea, ni gale muga e Lus. 20 Muri, e Iakop i ratea tara nita dagi, i ta maea, “A Vure bara i laho turagu, ge matakari iau na ni lahogu iea, ge habi a maki ni kani ga kani, a varakia ga rodo, 21 muri ge bole mule iau na tabeke ne tata na nivalemu, e BAKOVI DAGI bara ia a Vure nau. 22 Ra kedo iea a vakapesia i manga a kilakila ge vakasiri a hini nga ga hae a roho vomu vona. A maki i ravulu o habi nau bara habi mulea vomu a tabekena i taku.”